Tolosan, Oria ibaiaren ertzetan, iraunkortasun ekologikoa eta gizarte-lan integrazioa batzen dituen proiektu bat garatzen ari da. Zehar-Errefuxiatuekin eta Tolosako Udalaren arteko lankidetzari esker, pertsona errefuxiatuek eta nazioarteko babes-eskatzaileek ibaiaren arroa garbitzen dute, beren autonomia sendotuz eta komunitatearen ongizateari ekarpena eginez.

Pertsona errefuxiatuentzat, lan-merkaturako sarbidea oztopoz betetako bidea izan daiteke. Errealitate horri erantzunez, Zehar-Errefuxiatuekin-ek gizarte- eta lan-integrazioa sustatzeko ekimenak gidatzen ditu. Horietako bat Oria ibaiaren garbiketa proiektua da, eta, 2022az geroztik, urtean bost pertsona —lau parte-hartzaile eta teknikari koordinatzaile bat— kontratatzen ditu bi astetan zehar.

Lanak ibaiertzetako hondakinak kentzea barne hartzen du, Tolosako Udalaren mantentze-lanetako taldearekin elkarlanean. Lankidetza honek edukiontziak jartzea, hondakin astunen kudeaketa eta beharrezko segurtasun-neurriak betetzea bermatzen ditu.

Ekimen honen eragina lan-esparrutik harago doa. Zehar-Errefuxiatuekin-eko zentroen koordinatzailea den Nerea Maiztegiren arabera, proiektuaren helburua da “pertsona errefuxiatuen lan-integrazioa sustatzea, sareak sortzen lagunduz, sozializatuz eta beren autonomia indartzearen bidez autoestimua bultzatuz.”

Gainera, lankidetza honek pertsona migratzaileen inguruko aurreiritziak gezurtatzen laguntzen du, espazio publikoak hobetzeko eta gizarte inklusiboago bat eraikitzeko egiten duten ekarpena ikusgai jarriz.

Proiektua Tolosako Udalak Oria ibaia osasuntsu eta garbi mantentzeko egiten dituen ahaleginekin bat dator, besteak beste, garbiketa ekintzak ikastetxe eta tokiko elkarteekin elkarlanean egitea, zubietan sareak jartzea eta zaborrontziak berritzea hondakinak uretara ez iristeko.

Horrelako proiektuak erakunde eta erakundeen arteko lankidetzak gizarte- eta ingurumen-arloetan zer-nolako alde esanguratsua egin dezakeen adibide dira. Ekimen hauekin, Tolosak ez bakarrik pertsona errefuxiatuen integrazioa indartzen du, baizik eta ingurune garbiago eta iraunkorrago baten aldeko apustua egiten du.

Narratiba sozial eta mediatikoetako estereotipoek eta ordezkaritza txikiak emakume errefuxiatu, migratzaile eta arrazializatuen parte-hartze soziopolitikoa eragozten dute, Zehar-Errefuxiatuekin erakundearen arabera

• Indarkeria sinbolikoak maila bat gora egiten du, eta diskriminazio eta indarkeria arrazista eta sexista bihurtzen da eguneroko elkarrekintzetan. Horrela, emakume errefuxiatu, migratzaile eta arrazializatuen aurkako indarkeria-zikloa betikotu egiten da.
• Kulturen arteko bizikidetza errazteko, narratiba eta irudikapen nagusiak kritikoki aztertu behar dira, eta, aldi berean, emakume errefuxiatu, migratzaile eta arrazializatuek sortu eta protagonista dituzten narratibak kokatu eta ikusarazi behar dira ezagutza, komunikazioa eta kultura eraikitzeko espazioetan.
• Zehar-Errefuxiatuekin erakundearen “Sareginak” proiektuaren aurkezpen ofiziala azaroaren 30ean egingo da, Bilbon, Fair Saturday jaialdiaren barruan. Proiektu honen bidez, Euskadiko emakume errefuxiatu eta migratzaileak ahaldundu nahi dira, eta parte-hartze soziopolitiko eta kultural handiagoa eman nahi zaie. Horretarako, errefuxiatu/migratzaileak eta bertakoak izanik, gaur egun Euskadin bizi diren sei emakume artistarekin egindako Laborategi Kulturalean jarriko dugu arreta, hiru diziplina artistikori lotuta: argazkigintza, poesia eta antzerkia.

Sareginak proiektuari buruzko informazioa

Bilbo, 2024ko azaroaren 25a. Urtero azaroaren 25ean egiten den Emakumeen Aurkako Indarkeria Ezabatzeko Nazioarteko Egunaren barruan, Zehar-Errefuxiatuekin erakundeak agerian jarri nahi du emakumeen ahotsek eta gorputzek, sexu-identitate ez-normatiboek eta dibertsitate funtzional fisiko, kognitibo edo sentsoriala dutenek ordezkaritza txikia dutela narratiba sozial eta mediatikoetan, eta horrek eragotzi egiten duela haien parte-hartze soziopolitikoa. Nagusi diren narratibek ikusezin bihurtzen dituzte eta/edo lekukotasun-balioa ematen diete emakume horiek sortu eta protagonista dituzten narratibei, eta, irudikatzen dituztenean, indarkeriaren biktima gisa edo feminizazio handiko edukiei lotuta agertzen dira, hala nola zainketekin edo bizitzaren erreprodukzio sozialarekin lotuta.

“Emakume errefuxiatu, migratzaile eta arrazializatuen aurkako hasierako indarkeria sinboliko horrek maila bat gora egiten du, eta modu zuzenago eta kaltegarriagoetan agertzen da eguneroko elkarrekintzetan, eta, horrela, betikotu egiten da haien aurkako indarkeria-zikloa”, azaltzen du Marta García Teránek, Zehar-Errefuxiatuekin erakundeko intzidentzia eta partaidetza sozialeko zuzendariak. “Ahots desberdinak falta dira, bereziki emakume errefuxiatu, migratzaile eta arrazializatuenak, ikuspegi eta esparru desberdinetatik konta ditzaten historiak. Gainera, ezagutza, komunikazioa edo kultura eraikitzeko espazioetan

sartzea lortzen dutenek ere alboratuta jarraitzen dute generoa, etnia, klasea, sexu-identitatea eta adinagatik. Horrek desabantaila handiko egoeretan jartzen ditu, eta hainbat zapalkuntza-moduren mende”.

Zehar-Errefuxiatuekin erakundeak ikuspegi multidimentsionalarekin aztertzen ditu narratibak, batez ere immigrazioaren aurkako diskurtsoak dituztenak, eta argi ikusten du horietan emakumeak nola irudikatzen diren aztertu behar dela. Hau da, zer balio eta ideia indartzen diren, zer genero-alborapen dauden, eta horiek nola eramaten gaituzten migrazio-identitatea estereotipo negatiboetara, edo norberarenak ez baizik eta besteen begiradak aukeratu dituen esparruetara, mugatzen edo lotzen duten imajinarioak indartzera.

Hedabideek, publizitateak, fikzioak eta kultura-ekoizpeneko espazioek helarazten dizkiguten narratibek gorputz beltzak deshumanizatzen jarraitzen dute funtsean, eta pertsona beltz eta arrazializatuak iritsi berritzat jotzen dituzte betiko. Salbuespenaren narratibak jende beltza heroi gisa elkarrizketatzeko aukera baino ez du jasotzen, zerbait egiten duen edo espero ez zen espazio batera iristen den lehen pertsona beltz gisa, edo arrazakeriaz nahiz xenofobiaz hitz egiteko soilik balio duen testigantza moduan. Horrela, narratiba anekdotara mugatzen da, haien ezagutzak, lan-esperientzia eta/edo prestakuntza alde batera utzita, eta, gainera, pertsona beltz eta arrazializatuak hipersexualizatu egiten dira, emakumeak bereziki.

“Immigrazioaren aurkako diskurtsoak argudiorik gabe utziko dituzten esparruak eraikitzeko, funtsezkoa da hedabideen, erakunde publikoen, kultura-eragileen nahiz gizarte-erakunde eta -mugimenduen rola, narratibak arrazakeriaren aurkako komunikazio-ikuspegi inklusibo batetik eraikitzeko”, dio García Teránek. “Harreraz hitz egiten dugunean, ez gara ari ostatu emateaz soilik, bizitoki bat eskaintzeaz. Pertsona errefuxiatuak guztion artean osatzen dugun euskal gizartearen parte gisa onartzeaz ari gara, haien historia eta kultura ezagutzeaz, ibilbidea eta ezagutzak balioesteaz eta gurea haiei hurbiltzeaz, denon artean espazioak eta bizipenak parteka ditzagun eta kulturen arteko benetako bizikidetza sustatzeko”.

Emakumeak artearekin saregintzan 

Zehar-Errefuxiatuekin erakundea “Sareginak” proiektua gauzatzen ari da. Honen bidez, parte-hartze soziopolitiko eta kultural handiagoa eman nahi zaie emakume errefuxiatu eta/edo migratzaile eta euskaldunei, emakumeen aniztasuna eta eragintza agerian jarriko duten narratiba berriak eraikitzeko, ikuspegi intersekzionaletik.

Proiektu hau Bizkaiko Foru Aldundiak, Gipuzkoako Foru Aldundiak eta Donostiako Udalak finantzatzen dute lehen fasean, eta eLankidetza-Lankidetzarako eta Elkartasunerako Euskal Agentziak, Bizkaiko Foru Aldundiak eta Gipuzkoako Foru Aldundiak, berriz, hasten ari den II. fase honetan. “Sareginak” proiektuan metodologia berritzaileak erabiltzen ari gara, euskal herritarren sektore berrietara iristeko, estrategia integral baten bidez. Estrategia horrek honako hauek biltzen ditu: ikuspegi feminista intersekzional eta dekoloniala duen ikerketa parte-hartzailea, hedabideetan, kulturan eta komunikazio soziopolitikoan egiten diren narratibei buruz; diziplina anitzeko Laborategi Kultural bat (poesia, musika eta antzerkia, besteak beste), genealogia feministako narratiba autobiografikoak eraikitzeko ahalmenak garatzeko eta indarkeriak konpontzeko; era askotako emakumeak protagonista dituzten kultura eta komunikazio komunitarioko esperientzien trukea sustatzea; eta herritarrak sentsibilizatzea eta erakunde publikoetan eragitea, hausnarketarako eta hedapenerako hainbat espazioren bidez.

Emakume artista errefuxiatu eta migratzaileak Fair Saturday jaialdian, azaroaren 30ean, Bilbon

Azaroaren 30ean, larunbata, Bilbon eragin soziala duen Fair Saturday arte- eta kultura-jaialdiaren barruan, Zehar-Errefuxiatuekin erakundearen “Sareginak” proiektuaren aurkezpen ofiziala egingo da. Jardunaldia Yimby Street Achúcarro aretoan egingo da (Atxukarro Doktorearen kalea, 3), eta 10:30ean hasiko da ikus-entzunezko erakusketa batekin. Bisita gidatua egingo da proiektuak barne hartzen duen argazki-laborategiarekin lotuta egin den lana ezagutzeko.

11:00etan, bi tailer espres egingo dira, bata argazkigintzakoa, Lorna Biermann-ek eta Sara Elisabet Gimenok gidatuta, nola begiratzen gaituzten hausnartzeko, eta antzerkigintzakoa bestea, Getari Etxegaraik eta Tanya de la Cruz-ek zuzenduta, arrazakeriaren aurkako umorezko esketxen interpretazioa lantzeko.

12:30ean, elkarrizketa-mahaia egingo da: “Emakumeak artearekin saregintzan”. Lola Boluda Guigó-k eta Lina Jiménez Numpaque-k hartuko dute parte, eta Lorna Biermann eta Sara Elisabet Gimeno arituko dira moderatzaile-lanetan.

Arratsaldean, 18:00etan, “Dejar Atrás la Casa en Llamas” errezital poetiko-eszenikoa egingo da, hau da, poesia-laborategiko sorkuntza-lan poetikoen aurkezpen bat, Jara Calvo, Tfarah Myeslem eta Rove Rivera-ren eskutik. Eta egunari amaiera emateko, 19:00etan, Ajala la Necia-ren musika-emanaldia izango da.

Harremanetarako informazioa:
688689512 / comunicación@zehar.eus

• Erkidegoko eta erkidegotik kanpoko migratzaileentzako informazio- eta orientazio-zerbitzu publikoa Eusko Jaurlaritzak eta Bilboko Udalak sortua da eta Zehar-Errefuxiatuekin erakundeak kudeatzen du
• Eusko Jaurlaritzako Ongizate, Gazteria eta Erronka Demografikoko sailburu Nerea Melgosak eta Bilboko alkate Juan Mari Aburtok zentroa bisitatu dute, proiektua xehetasun handiagoz ezagutzeko

Bilbo, 2024/11/15

Euskadiko lehen Harreraguneak ateak irekiko ditu datorren astelehenean, azaroak 18, Bilbon. Migratzaileak Hartzeko Euskal Zerbitzuaren eredu pilotua da, pertsona migratzaileei informazioa eta orientazioa emateko zerbitzu publiko espezializatua, Eusko Jaurlaritzak eta Bilboko Udalak sortua eta Zehar-Errefuxiatuekin erakundeak kudeatua. Bulegoak Justizia Jauregiaren inguruan ditu, Colon de Larreategui kaleko 3. zenbakian.

Nerea Melgosa Eusko Jaurlaritzako Ongizate, Gazteria eta Erronka Demografikoko sailburuak eta Juan Mari Aburto Bilboko alkateak instalazioak bisitatu dituzte gaur, ostirala, zerbitzu berria bertatik bertara ezagutzeko, bai instalazioak, bai bertan lan egingo duten pertsonak.

Bilboko alkate Juan Mari Aburtok adierazi duenez, “garaia iritsi da aukera-berdintasunerako eta gure egungo eta etorkizuneko Bilbo eraikitzeko funtsezkotzat jotzen dugun baliabide batekin lanean hasteko. Harreragune aukera bat da Bilborentzat, funtsezko tresna gizarte gisa arrakasta izateko, gizarte-kohesioa sortzeko eta hiri-proiektuaren parte izateko”.

Eusko Jaurlaritzako Ongizate, Gazteria eta Erronka Demografikoko sailburu Nerea Melgosak nabarmendu duenez, “Harreragunerekin batera orientatu, lagundu eta baliabide erabilgarriak eskainiko dizkiegu migratzaileei Bilbon duten ezarpen-prozesuan. Hau lehen urratsa da, proiektu pilotu bat, eta beste euskal udalerri batzuetan errepikatzeko ebaluatuko da. Izan ere, ekimen hau Euskal Harrera Ereduaren hedapenaren barruan kokatzen dugu, eta Migraziorako Itun Sozialean eta Herritartasun, Immigrazio eta Asiloari buruzko 2022-2025 Kultura arteko VI. Planean hartutako erakunde arteko konpromisoei erantzuten die. Plan horretan, dagoeneko aipatzen zen baliabide guztiak bateratuko zituen erreferentziazko espazio bat gaitzeko beharra”.

Bi agintariek nabarmendu dute Zehar-Errefuxiatuekin erakundeak Harreragunen egingo duen lan garrantzitsua, bere ibilbidean, bere ezaguntzan eta bere jardunean oinarrituta, migratzaileak hartzen dituzten erakundeekin eta zerbitzu berria erabil dezaketen pertsonekin egindakoa.

Erantzun pertsonalizatua

Bulegoan, migratzaileei erantzun pertsonalizatua emango zaie, informazioa jaso dezaten gai hauen inguruan: erroldatzea, atzerritartasun-izapideak, osasun-txartela, adingabeen eskolatzea, hizkuntza ofizialen eta beste hizkuntza batzuen ikaskuntza eta lan-orientazioa, besteak beste.

Gogorarazi behar da zerbitzu berri honek lankidetza estua duela kulturen arteko bizikidetza- eta harrera-programak garatzen urteak daramatzaten gizarte-erakundeen sare zabal batekin, eta orain bulego berritik lagundu nahi diela Bilbon ezartzen diren pertsona migratzaileei, hirian egokitzeko prozesuan eta berdintasun-baldintzetan eskubideak eta aukerak eskuratzeko prozesuan.

Erreferentziako zerbitzu publikoa

Harreragune zerbitzuaren xedea migratzaileei orientazioa ematea, laguntzea eta baliabide erabilgarriak eskaintzea da, Bilbon izaten ari diren ezarpen-prozesuan. Bere ikuspegia da Bilbon erreferentziazko zerbitzu publikoa izatea, migratzaileen beharrei helduko diena migrazio-proiektuan, haiek iritsi, ezarri eta bertan garatzeko prozesuan, gainerako biztanleekiko berdintasun-baldintzetan eskubideak eskuratu eta balia ditzaten sustatzeko.

Harreragunek atzerritar jatorriko migratzaileen iritsierako lehen faseko jarduerak indartzen ditu. Hain zuzen ere, Migraziorako Euskal Itun Sozialak nabarmentzen du harrera oso garrantzitsua dela integrazio-prozesuetan eta kulturen arteko bizikidetzan.

Eskaintzen dituen zerbitzu zehatzak

Harreragunek hainbat zerbitzu espezializatu eskaintzen ditu, premia espezifikoenetara egokituta:

• Atzerritartasun-aholkularitza juridikoa
• Prestakuntza- eta lan-orientazioa
• Ikasketen homologazioa eta baliozkotzea
• Laguntza psikosoziala
• Familia berriz elkartzeko laguntza
• Gizartean eta kirolean parte hartzea

Zehar-Errefuxiatuekin elkartetik, Euskadira migratu duten gazteekin egiten dugun lanaren aukerak eta erronkak aztertu ditugu Cáritas La Rioja-k antolatutako IV Jornadas de Pobreza y Exclusión Social-ean. Topaketa azaroaren 11tik 13ra ospatu da Logroñoko Lagares Espazioan, “La migración, una mirada humana” lelopean, eta aukera bat zen Euskaditik gazte hauekin egiten dugun lana eta dugun konpromisoa agerian uzteko, HEMEN programaren bidez. 

Azaroaren 12an, esperientzia eta praktika onen mahaian parte hartu dugu, eta Euskadira erreferentziazko familia-sarerik gabe iritsi eta adin nagusira iristean egoera zaurgarrian geratu diren gazteak hartzeko eta laguntzeko gure esperientzia partekatu dugu. HEMEN programa aitzindaria da; 2006az geroztik 2.578 gazte baino gehiagori laguntza-sare erabakigarria eskaini die. Zehar-Errefuxiatuekinek 2008az geroztik gidatzen duen programa honek premia zehatz bati erantzuten dio: gazte migratzaileak heldu autonomo bihurtzeko bidean laguntzea eta ahalduntzea. 

 “HEMEN programa azken 16 urteetan Bizkaiaren eta batez ere Magrebeko herrialdeen (Maroko eta Aljeria) arteko akueduktua izan da, lurralde txiki honetara heltzen diren adingabe gehienak bertatik baitatoz eta familia-sarerik ez baitute. Harrera, laguntza integrala, kultura arteko elkarbizitza, hezkuntza eta komunitate mailako esku-hartze espazioa da, eta gaztearen eta erreferentziazko hezitzailearen artean lotura sendoa eraikitzen da, heldutasunerako eta proiektu pertsonala eta familiakoa hemen garatzeko garrantzitsua dena,” adierazi zuen David Pinillak, Zehar-Errefuxiatuekineko HEMEN taldeko kideak. 

 HEMEN: Laguntza integraleko sare bat 

 HEMENek Bizkaiko adingabeen zentroetan egon diren gazte atzerritarrak artatzen ditu, baina egonaldi laburragatik (12 hilabetetik beherakoa) ez dituzte emantzipaziorako baliabideak lortzeko baldintzak betetzen. Gazteria eta migrazioaren arloko erreferentziazko erakundeekin lankidetzan —Cáritas Bizkaia, ADSIS Fundazioa, Ellacuría Fundazioa, Harribide, Izangai Elkartea, Margotu, Erain eta Peñascal S. Coop.—, programak laguntza psikosoziala, juridikoa eta administratiboa eskaintzen die gazteei. Lan hau Bizkaiko Foru Aldundiaren eta Eusko Jaurlaritzako Migrazio eta Asilo Zuzendaritzaren babesari esker egiten da. 

 Lorpenak ospatzen eta etorkizuna eraikitzen 

 2023ko azaroan, HEMEN programaren 16. urteurrena ospatzen dugu “Ni HEMEN naiz / 16 urte hemen” ekitaldiarekin, Bilboko Erreprodukzioen Museoan. Bertan, gazteek beren istorioak eta lorpenak partekatu zituzten. Orain, Logroñon, konpromisoa eta elkartasuna inspiratzen jarraitzea espero dugu, gazte horiek beren gaitasunak garatzeko eta komunitateari ekarpen aktiboa egiteko aukera izango duten gizarte inklusibo bat eraikitzen jarraitzeko. 

• Migratzaileak informatzeko eta orientatzeko zerbitzu publikoa da, bai Europako Erkidegokoak, bai Europar Batasunetik kanpokoak
• Eusko Jaurlaritzak eta Bilboko Udalak sortua, zerbitzu berri hau Zehar-Errefuxiatuekin erakundeak kudeatuko du
• Bizkaiko hiriburuak errealitate demografiko askotarikoa islatzen du: biztanleen % 17,3 atzerritarrak dira

Lehenengo Harreragunea hilabete honetan irekiko da Bilbon. Migratzaileak Hartzeko Euskal Zerbitzuaren eredu pilotua da. Eusko Jaurlaritzak eta Bilboko Udalak sortu eta Zehar-Errefuxiatuekin erakundeak kudeatzen du, eta Justizia Jauregiaren inguruan izango du bulegoa, Colon de Larreategui kaleko 3. zenbakian.

Zerbitzu berri honek lankidetza estua du kulturen arteko harrera- eta bizikidetza-programak garatzen urteak daramatzaten gizarte-erakundeen sarearekin, eta, orain, Abandoko bulegotik lagundu nahi die Bilbon ezartzen diren pertsona migratzaileei, hirian egokitzeko prozesuan, eta eskubideak eta aukerak berdintasun-baldintzetan eskuratzeko bidean.

Bulegoan, migratzaileei erantzun pertsonalizatua emango zaie, informazioa jaso dezaten gai hauen inguruan: erroldatzea, atzerritartasun-izapideak, osasun-txartela, adingabeen eskolatzea, hizkuntza ofizialen eta beste hizkuntza batzuen ikaskuntza eta lan-orientazioa, besteak beste.

Zerbitzu hau Euskal Harrera Ereduaren hedapenaren barruan kokatzen da, eta Migraziorako Itun Sozialean eta Herritartasun, Immigrazio eta Asiloari buruzko 2022-2025 Kultura arteko VI. Planean bere gain hartutako erakunde arteko konpromisoei erantzuten die. Plan horretan jada aipatzen zen baliabide guztiak bateratuko zituen erreferentziazko gune bat gaitzeko beharra. Zerbitzuak 2030 Agendaren Garapen Jasangarrirako Helburuak lortzen ere laguntzen du.

2024ko urtarrilaren 1ean atzerritar jatorriko biztanleen % 17,3rekin (60.000 pertsona baino gehiago, Bilboko Immigrazioaren Tokiko Behatokiaren txostenen arabera), Bizkaiko hiriburuak errealitate demografiko anitza islatzen du. Hala, aniztasun horrek eta Bilboko Udalak lehendik dituen baliabideek (esperientzia handiko teknikariak besteak beste) eragin dute lehen Harrerragune pilotua Bilbon kokatzea.

Erreferentziako zerbitzu publikoa

Harreragune zerbitzuaren xedea migratzaileei orientabidea ematea, laguntzea eta baliabide erabilgarriak eskaintzea da, Bilbon izaten ari diren ezarpen-prozesuan. Bere ikuspegia da Bilbon erreferentziazko zerbitzu publikoa izatea, migratzaileen beharrei helduko diena migrazio-proiektuan, haiek iritsi, ezarri eta bertan garatzeko prozesuan, gainerako biztanleekiko berdintasun-baldintzetan eskubideak eskuratu eta balia ditzaten sustatzeko.

Harreragunek atzerritar jatorriko migratzaileen iritsierako lehen faseko jarduerak indartzen ditu. Hain zuzen ere, Migraziorako Euskal Itun Sozialak nabarmentzen du harrera oso garrantzitsua dela integrazio-prozesuetan eta kulturen arteko bizikidetzan.

Eskaintzen dituen zerbitzu zehatzak

Harreragunek hainbat zerbitzu espezializatu eskaintzen ditu, premia espezifikoenetara egokituta:

• Atzerritartasun-aholkularitza juridikoa
• Prestakuntza- eta lan-orientazioa
• Ikasketen homologazioa eta baliozkotzea
• Laguntza psikosoziala
• Familia berriz elkartzeko laguntza
• Gizartean eta kirolean parte hartzea

Talde- eta komunitate-jarduerak ere antolatzen ditu integrazio-prozesuan laguntzeko, besteak beste:

• Gaztelania eta euskara ikastaroak
• Informazio-saioak gai hauei buruz: lan-eskubideak, atzerritartasuna, berdintasuna, osasuna, hezkuntza-sistema, etxebizitza, finantza-hezkuntza, tratu-berdintasuna eta diskriminaziorik eza…
• Informazio-saioak gai hauei buruz: euskal kultura eta gizartea, parte-hartze aktiboa Bilboko komunitate-bizitzan
• Kulturen arteko bizikidetza-jarduerak

Migraziorako Itun Soziala eskubideen ikuspegitik Euskadin inklusioa eta kulturen arteko bizikidetza sustatzen dituen ekimena da.

Hain zuzen ere, Itunaren esparruan, joan den astean, EUDELek eta Eusko Jaurlaritzak ‘Euskadin atzerritarrei harrera egiteko politikak diseinatzeko eskuliburua’ aurkeztu zuten, euskaraz ‘Harrera Ehundu’ izenekoa. Tokiko harrera modu autonomoan eta udalerriko errealitate espezifikoaren arabera kudeatzeko tresna da, eta Harreraguneak udalerrira iristen diren pertsonak baliabideen eta eragileen sarearen bidez orientatzeko eta laguntzeko giltzarria dira honetan.

Lekualdatze behartuen eta “migrazio klimatikoen” kausa eta ondorioei buruz gehiago jakin nahi duzu? Azaroaren 11tik aurrera egin ahalko duzu zure kabuz, ordutegirik gabe, gure formakuntza berriari esker: “Deserrotuak: ez da klima, kapitala baizik. Indarkeria, erresistentzia eta alternatibak desplazamendu behartuen aurrean”. Hurrengo astelehenean, azaroaren 11an, eskuragai egongo da botere korporatiboaren eta muga-politiken eragina ulertu nahi duten pertsona guztientzat.  

Zer ikasiko duzu kurtsoan?  

Programa honek garrantzi handiko gaiak jorratuko ditu, Giza Eskubideetan eta justizia sozialean aritutako ekintzaile eta adituen esku. Zortzi saioen bitartez esploratu ahalko duzu: 

• Nazioarteko babesa eta genero ikuspegia: Giza Eskubideen defentsa eta emakume defendatzaileen papera. Gertutik ezagutuko duzu bi emakume defendatzaileen esperientzia: Dalila Argueta, Guapinol-eko (Honduras) lurralde defendatzailea eta Leiria Vay, emakume maya K´iché Giza Eskubideen eta ama lurraren defendatzailea.  

• Multinazionalen eragina: Erika González eta Pedro Ramiro, OMAL-Paz con Dignidad-eko kideek, partekatuko dute korporazio handien papera bertako komunitateen lekualdatze behartuetan, kontakizun justuago eta arduratsuago bat eraikitzen laguntzeko.  

• Muga politikak: Euren lurraldeetatik ihes egiten dutenen egoerari buruz hausnartuko dugu, Gustavo de la Orden ikertzailea eta Salvamento Maritimo Humanitario GKErekin, Erdiko Mediterraneoan bizitzen hari diren egoerei buruzko kontakizunak partekatuko dituztenak.  

• Kontsumo alternatibak eta ikuspegi ekofeminista: Ainhoa Bilbao, Iratxe Arteagoitia, Silvia Piris eta Julia Martí bizitza eta jasangarritasuna erdigunean jartzen dituzten alternatibak aurkeztuko dituzte ikuspegi ekofeministatik. Bidezko eta erresilienteago den mundua aldarrikatzen duen ikuspegitik.  

Xehetasun garrantzitsuak: 

Dohaineko kurtsoa da hau, eta azaroaren 11tik aurrera, saioetara sartu ahal izango duzu era autonomoan lan egiteko. Ez daude denbora mugak, zure erritmora ikasi eta kezkatzen zaituzten gaiekin konektatu.  

Animatu zaitez, formakuntza esperientzia eraldatzaile honetara batzen!  

Informazio gehiagorako eta kurtsoan sartzeko gure kampus birtuala bisitatu:  https://campus.zehar.eus/   

Arabako Foru Aldundiaren, Zehar-Errefuxiatuekin eta Entre tanto Entretente-Bitartean Jolasean ekimenaren helburua da jatorri desberdinetako pertsonak mahai batean esertzea, zurrumurru arrazistak eta xenofoboak zalantzan jartzeko eta bizikidetza sustatzeko 

Iaz, 37 nazionalitateko 1.228 pertsona bildu ziren Arabako hamabost udalerritan

Gasteiz, 2024ko urriaren 24a. ‘Hamaika zapore, mila istorio – Mil sabores, mil historias’ lelopean, azaroaren 24an, igandea, Arabako hainbat etxek eta txokok bat egingo dute Bizilagunak ekimenarekin. Ekimen hori Euskadi osoan egiten da eta bere helburua da mahai baten inguruan jatorri kultural desberdinetako bizilagunak biltzea, zurrumurru arrazistak eta xenofoboak zalantzan jartzeko eta bizikidetza sustatze aldera.

Arabako zortzigarren edizioa da, Arabako Foru Aldundiak, Zehar-Errefuxiatuekin eta Entretanto Entretente-Bitartean Jolasean elkarteak elkarrekin egindako proiektua. Jarduera hori bat dator kulturen arteko elkarbizitza sustatzea helburu duen aniztasuna kudeatzeko 2021-2024rako estrategiarekin. Estrategia hori landa eremuko udalerrietara dago bideratuta. Haren helburuetako bat da biztanleria migratuari eta arrazializatuari lotutako zurrumurruei, aurreiritziei eta estereotipoei aurre egitea, askotan bizikidetza zailtzen baitute, eta topaguneak eta harreman-guneak bilatzea.

Iaz, 37 nazionalitate desberdinetako 1.228 pertsona bildu ziren lurralde osoko hamabost udalerritan egindako bazkarietan; kulturarteko topaketen % 60 landa eremuko herrietan egin ziren.

Joana del Hoyo Arabako Foru Aldundiko Berdintasun eta Giza Eskubideen zuzendariak aurkezpenean nabarmendu duenez, Araban badago “zurrumurruen aurkako eragile gisa eratu diren pertsonen sare finkatua. Pertsona horiek jarrera aldaketan parte hartu nahi dute, beren ingurune hurbilenei informazioa emanez eta sentsibilizatuz, immigrazioari buruzko estereotipo negatiboei aurre egiteko”.

Aurkezpenean, zuzendariarekin batera izan dira June Astobiza Ugarte, Zehar-Errefuxiatuekin erakundeko Eragin eta Partaidetza Sozialerako taldeko kidea; Bárbara Martínez Ábalos, Entretanto Entretente-Bitartean Jolasean elkarteko Esku Hartze Komunitarioko teknikaria; eta Asmae Bentounsi, dinamizatzaile eta Bizilagunak ekimeneko partaideak.

Joana del Hoyok azpimarratu duenez, azaroaren 24ko kulturarteko bazkariak “pastelaren ginda” izango dira, “egunez egun eta urte osoan” Arabako kuadrilla guztietan sortu diren bizikidetza taldeek egiten duten lanaren barruan. Aldi berean, lurraldeko eragile asoziatibo, tekniko eta politikoek eta, balioa eman dio “batez ere, Arabako zurrumurruen aurkako sareak osatzen dituzten bizilagunek egiten duten lanari”.

June Astobiza Zehar-Errefuxiatuekin elkarteko ordezkariak nabarmendu duenez, “Bizilagunak elkarguneak sortzeko bultzada txiki gisa sortu da”. “Zehar-Errefuxiatuekin elkartearen ustez, bizilagunen arteko elkarrizketak, hizketaldi adiskidetsuak, elkar ezagutu eta aitortzeak, bakoitzaren bizipenak trukatzeak eta gure kaleak partekatzeak Araban bizi diren pertsona guztien parte hartze komunitarioa errazten du, bizitzako eremu guztietan”.

Bestalde, Barbara Martínezek, Entretanto Entretente-Bitartean Jolasean elkartekoak, edizio honen leloa aipatu du, eta honako hau ziurtatu du: “Historia bakoitza garrantzitsua da, eta askotan ez ditugu ezagutzen gure bizilagunek dakartzatenak. Horixe da Bizilagunak eskaintzen duena, ‘albokoa’ gehiago ezagutzeko aukera bikaina, bereziki garrantzitsua baita bizikidetza eta bakea arriskuan dauden mundu honetan”. “Parte hartu nahi duen oro animatzen dugu, aukera paregabea baita jende berria ezagutzeko, harreman berriak ehuntzeko eta beste bizilagun batzuk entzuteak eta ezagutzeak dakarren esperientziaz gozatzeko”, amaitu du.

Ekimen honekin bat egin dute honako hauek: ZAS Zurrumurruen Aurkako Sarea; SOS Arrazakeria; Arabako Lautadako, Aiarako, Añanako, Gorbeialdeko, Arabako Errioxako eta Arabako Mendialdeko kuadrillek eta Aguraingo, Asparreneko, Amurrioko, Artziniegako, Laudioko, Iruña Okako, Urkabustaizko, Arraia-Maeztuko, Kanpezuko, Eltziegko, Iekorako, Lapuebla de Labarca-ko, Samaniegoko eta Oiongo eta Guardiako udalek.

Argibideak eta izena emateko epea helbide honetan:  web.araba.eus/eu/kulturartetasuna/zurrumurruen-aurkako-estrategia

Zehar-Errefuxiatuekin elkarteak Europako mugetara iristen direnen aurkako indarkeriaren normalizazioa salatu du, joan-etorriak eragiten dituzten arrazoiak alboratzen diren bitartean

• Ez dira migratzaileak eta errefuxiatuak zuzenbide estatua arriskuan jartzen dutenak, Europako demokraziak mehatxatzen dituena pertsona horien aurka aplikatzen den erantzuna da.
• Erakundeak azpimarratzen du migratzaileak mehatxu bihurtzeak zilegitasuna ematen diola haiek indarkeriaz tratatzeari.

Txostena: zehar.eus/eu/deserrotuak

Bilbo, 2024ko urriaren 8a. Zehar-Errefuxiatuekin elkarteak “Deserrotuak, bipiltze eta mugen arteko ibilbidea” izeneko txosten berria egin du. Txosten horretan, EBko erauzketa-politiken eraginak aztertzen ditu, pertsonak lekualdatzera bultzatzen dituzten arrazoietako bat diren aldetik; ingurumenaren zaintzaileak eta lurraldearen defendatzaileak kriminalizatzeak eta material urrien ustiaketak zer-nolako loturak dituen jorratzen du; eta mugen kudeaketan indarkeriaren erabileraren normalizazioa eta legitimazioa salatzen ditu. Eta hori guztia Euskadira iritsi diren pertsonen istorioen bidez egiten du. Horietako batzuk beren bizibideak desagertzearen ondorioz eta indarkeria areagotu delako iritsi dira, hala nola txostenerako elkarrizketatu diren senegaldarrak; eta beste batzuek, emakume aktibistek esaterako, betirako edo aldi baterako utzi behar izan dituzte beren lurrak, lurralde eta komunitate horien defentsan egindako lanagatik.

Zehar-Errefuxiatuekin elkarteko zuzendari Javier Canivell irmo mintzatu da gai horren inguruan: “‘Migrazio klimatikoari’ buruzko diskurtsoen aurrean, azpimarratu nahi dugu ingurumenaren degradazio larria giza bizitzarako ezinbestekoak diren ondasunen neurrigabeko ustiapenaren ondorioa dela, eta lotura zuzena duela energiaren sorkuntzarekin, EBko sektore estrategikoentzako gai kritikoen hornidurarekin (telekomunikazioak eta arma-industria, besteak beste), abeltzaintzarekin eta arrantza industrialarekin, besteak beste. Jarduera horiek ezartzeak biztanleriaren lekualdatzeak eragiten ditu, eta, batzuetan, protestak zapalduz ezartzen dituzte jarduera horiek”.

Zehar-Errefuxiatuekin elkartetik, nabarmentzen dute lekualdatzera behartutako pertsonek, aldi berean, eraso mediatikoa eta indarkeria legitimatzera bideratutako kudeaketa politikoa jasaten dituztela. Diskurtso ofizialetan, harro esaten da errefuxiatuak babestu egin behar direla eta migrazio erregularra sustatu behar dela, baina Afrikatik datozen pertsonek –Senegaldik datozenek, kasu– ez dute, de facto, sartzeko bide ez erregularrik ez segururik, eta bideari lehorretik eta itsasotik ekiten dioten pertsonak ez dira identifikatzen asilo-bilatzaile gisa edo nazioarteko babesa behar duten pertsona gisa, baizik eta administrazio-legeak urratzen ari diren pertsona gisa. Azkenik, ia guztiei ukatu egiten zaie babesa, eskatzea lortzen badute.

“Eskuin muturraren gorakada izugarri kezkagarria da gizarte demokratikoentzat, baina ezin dugu ahaztu migratzaileak eta errefuxiatuak, EBra sartzean, gero eta errepresio handiagoa jasaten ari direla, eta errepresio hori gero eta normalizatuagoa dagoela, baita gobernu aurrerakoien aldetik ere”, gaineratu du Canivellek.

Espainiako estatuari dagokionez, adibide hauek ditugu, besteak beste: Melillako 2022ko ekainaren 24ko sarraskia; Tarajalgo heriotzak; Herritarren Segurtasun Legearen indarraldia; itsas erreskate humanitarioko lanei jarritako traba burokratikoak eta horien kriminalizazioa; aireportuetan igarotzeko bisak ezartzea zenbait herrialdetatik datozen bidaiariei sarrera ixteko, hala nola Siriatik, Yemendik, Palestinatik, Somaliatik eta Senegaldik datozenei; poliziarekin hitzordua lortzeko oztopoak, eskaerak lurraldean izapidetu ahal izateko; asilo-legedia ez arautzea (2009ko Legea indarrean sartu eta 15 urte igaro direnean); eta nazioarteko babesari dagokionez, EBko aitorpen-tasarik baxuena, etsipena eragiteko ariketa argi gisa. Horiek guztiek argi erakusten dute normalizatuta dagoela beren bizitza babesten saiatzen ari direnen oinarrizko eskubideak urratzea.

Txostenaren aurkezpena bihar Bilbon

‘Deserrotuak, bipiltze eta mugen arteko ibilbidea’ txostena jendaurrean aurkeztuko da bihar, asteazkena, urriak 9, 18:00etan, Bilborock aretoan (Mesedeetako kaia 1, Bilbo).

Aurkezpenean honako hauek hartuko dute parte: Patricia Barcenak, Defensor del Pueblo-en bigarren ondokoak, Kanaria Uharteetako egoera humanitarioaren aurrean erakundeak egindako jarduerak eta gomendioak aztertuko ditu; Joana Abrisketak, Zuzenbidean doktore eta Deustuko Unibertsitateko Nazioarteko Ekintza Humanitarioko Masterraren zuzendariak, Migrazioaren eta Asiloaren Europako Itunaren gako nagusiak aztertuko ditu; eta Amaia Iguaranek, SMH Itsas Salbamendu Humanitarioaren Aita Mari ontziko eragin politikoaren, generoaren eta hezkuntzaren arduradunak, erreskate humanitarioko ontziek bizi duten kriminalizazio-egoerari buruz hitz egingo du.

Halaber, beste hauek ere hartuko dute parte: Abdoulaye Sarr-ek, SOS-Arrazakeria Gipuzkoako aktibista eta gizarte-hezitzaileak, arrantza-espoliazioari eta horrek senegaldarren erbesteratzearekin duen loturari buruzko begirada eskainiko du, eta Raquel Celisek, txostenaren egilekideak, haren ondorio nagusiak aurkeztuko ditu. Ekitaldia Tfarrah idazle sahararrak itxiko du, Devenir Seiba liburuaren egileak.

“Deserrotuak” lan-ildoak Eusko Jaurlaritzaren Lankidetzarako eta Elkartasunerako Euskal Agentziaren, Bizkaiko eta Gipuzkoako Foru Aldundien eta Donostiako Udalaren finantzaketa izan du 2021etik.

Harremanetarako informazioa: 688689512 / comunicación@zehar.eus